童年往事－天台小景+50年代Rap～數白欖
52年逃亡潮後，很多舊樓天台開始有人搭建鐵皮屋，我住的一座，便有三間。
新移民安頓下來便生小孩。
住在上上下下便有幾伙小朋友，十來個，經常嘻嘻哈哈在天台聚玩…
我們居住的是戰前舊樓，天台稍傾斜，地台舖大紅磚，就是我們聚玩的天地。天台周邊圍矮磚壆，壆外有小簷，夠膽量的話，就是[伏匿匿]藏身最佳位置。幾座樓是相連的，各自有獨立樓梯上天台，天台是相通的。
每當樓下住戶開火燒煤炭，天台煙囪噴出黑炭屎，各人便大叫 “走得麼，無鼻哥！” 立即避到樓梯間，若然有住戶在晒衣衫，稍為遲收下來，必定白衣變黑衣。
女仔喜歡跳橡筋繩、跳飛機、跳大繩… 男的伏匿匿(捉伊人)、擲陀螺、射碼子、嗶嗶紙… 有時男仔女仔一齊玩麻鷹捉雞仔、耍盲雞、拋手巾…
有一次，其實又一次，大伙兒玩得興高采烈之際，樓下打麻雀聲忽停，傳來樓梯響，急速腳步屬於頂樓惡師奶。人未到，聲先到： “ 你班X街Y家產，屋頂就來俾你哋踩冧喇！…” 各人早有準備，立即鳥獸散💨。男仔跨向隔鄰天台奔逃，女仔躲在天台人家的鐵皮屋背後。到惡師奶現身時候，天台已無人踪。不一會，惡師奶消失，人群再聚，改玩布袋抓子、舊習作簿摺飛機．．．
放紙飛機好玩。有的飛到遠處，落在大街，有的墜落對面樓簷蓬，我會留意著它。有時大風會把它翻起落在另一位置，有時再吹起飄落街。停下來不動的，我會有好幾天望著它，浮想聯翩… “💭它有著我的摺紙的特徵，心裡記著這是 “我的”飛機, 落在三樓的一隻是“牛仔的”，“豬標的” 在另一角落。我遙望著“我的”在簷篷上，想像它感覺會是怎樣…” 😛 我一直等待它們變舊、變黃，變爛…看誰的先被大雨沖走。
下雨天，有的女仔玩煮飯仔、有的在梯間猜包剪揼，勝出踏一級，鬥快上樓梯；男仔藏身樓梯角，玩解繩花、扯轉荷蘭水蓋來鎅斷對方的一個扯着的繩圈…
華師伯同牛仔有時數白欖。
記得一段白欖是這樣的：
華仔：先生你貴姓名？
牛仔：我叫黃老炳
華：你住喺邊一度
牛：我住喺九龍城
華：風景無>得頂？
牛：行到我氣頂頂
華：死得未？
牛：有九成
華：棺材呢？
牛：未買定…
華：你正一懵成成！
牛：我中意托大埕…
其實50年代數白欖同現在唱rap差不多。
