想當年的玩意(一)

放紙鳶

放紙鳶在50～60年代十分盛行。夏季來時，只要風好，便會見到漫天飄著風箏。
紙鳶的款式基本有馬拉、方鳶兩種。為了飛行穩定，可以貼上尾巴。尾巴可長可短，有置中、兩側或左中右。加了尾巴的紙鳶，高高低低散落在空中，似仙子起舞，造就昔日美景。
馬拉賣兩至五毫，方鳶賣一至二毫，細的，斗零有交易；一般紙紮舖有售，最有名品牌係高飛記。

當年家住油麻地，這一帶房屋都是戰前舊樓，高不過四層。在天台，視野可以從榕樹頭直到旺角。我喜歡爬上天台樓梯躉放紙鳶；這裡係最高點，無遮擋，容易起鳶。

紙鳶放了上天，頓成人的翅膀。拉動紙鳶線一下，像拍動翅膀一下；飛左、飛右、俯衝自如，樂在其中。最過癮是四圍挑機。那怕對方是神是鬼，戰場開在天上，就是鳶對鳶對決，不拼過你死我活不罷休。

戰況激烈時候，紙鳶斷線頻密。一見有鳶墜落，街僮(包括我自己)便從四方竄出，朝落點一窩蜂追去；搶到手便得意洋洋。假如落在天台，我會沿欄河邊(頂層屋簷邊緣)奔去，所以老媽子常罵我膽生毛。二人爭鳶，必扯爛；人多爭，最好係猜包剪揼；至怕就係有“高大衰”武力搶奪。

鎅鳶武林，我係高手。除了技高，“架撐”亦高檔(傾盡死慳死抵儲蓄的利是錢)。我用大線轆、名牌風箏、自家製魚絲線。

放紙鳶令人樂極忘形～最高境界係忘記時間、肚不餓、口不渴、眼不酸、手不累…還不止，手指割傷起繭、皮膚晒至焦黑…。

那些年，每到黃昏，街頭巷尾各家媽媽、嫲嫲就會在騎樓大叫“死仔包，食飯喇!”，完全不需要知道人在那裡，只管叫嚷。叫嚷聲落，震天哭喊聲起，晚飯又加多一味藤鱔炆豬肉。第二天，天台再見。